श्रावण १६ गते २०७६

छुच्चो गाडी (बालकविता)

       – रमेशचन्द्र घिमिरे

स्कुल पढ्न जाँदै थेँ किताब च्यापेर

रुझाइदियो गाडीले हिलो छ्यापेर
सफा लुगा लाएथेँ आइरन गरेथेँ

जुत्ता मोजा लाएर चट्ट परेथेँ

गाडी हाँक्ने गुरुले हाम्लाई हेपेर

कन्तबिजोक बनाए हिलो छ्यापेर
रोडकै छेउमा हिँड्दा नि सुख पाइनँ

गाडी नम्बर कति थ्यो टिप्न भ्याइनँ

गुडिहाल्यो तुरुन्तै ढोका ढ्यापेर,

मैलोधैलो बनायो हिलो छ्यापेर ।।
हिलै भई स्कुलमा जाऊँ कसरी ?

पढाइ छोडी फर्केर आऊँ कसरी ?

बसेकी छु रुँदै म दुःख खेपेर

दोधारमा पार्दिए हिलो छ्यापेर ।          – भोर्लेटार, लमजुङ     

रमेशचन्द्र घिमिरे