भाद्र ७ गते २०७७

अबैध जडिबुटी लुकाएको आरोपमा एक महिला पक्राउ

प्रमोद अधिकारी, लमजुङ
भाद्र ७,
अवैध जंगली जडीबुटी लुकाएको आरोपमा पहाडी जिल्ला लमजुङमा एक महिलालाई प्रहरीले पक्राउ गरेको छ । जिल्ला प्रहरी कार्यालय बेसीशहरबाट खटिएका प्रहरीले बेँसीशहर नगरपालिका वडा नं. ७ क्याम्पस रोडका ३८ वर्षीय सिद्धिमाया तामाङलाई पक्राउ गरिएको प्रहरी निरीक्षक ओमप्रकाश पुनले बताउनुभयो ।

अवैध रुपमा घरमा जडिबुटि लुकाएको भन्न विषेश सूचनाको आधारमा तामाङको घरमा खोजतलासी गर्नेक्रममा जडिबुटी लुकाइ राखेको फेला पारेपछि जडिबुटी सहित तामाङलाई पक्राउ गरिएको प्रहरी निरिक्षक पुनले बताउनु भयो । तामाङको घरमा लुकाइ राखेको अवस्थामा डालिङ (गुरुङ भाषामा टलिट) ४७६ दशमलव १ केजी, बन लसुन १५४ केजी, जटामसी १४ दशमलव ९ केजी, कुड्की २४ दशमलव ६ केजी, सुगन्धवाल १८ दशमलव ३ केजी, सतुवा ४ दशमलव ४ केजी, बन आलु २ दशमलव ८ केजी गरी ६९५ दशमलव १ केजी बरामद गरिएको प्ररही निरीक्षक पुनको भनाई छ । उहाँका अनुसार ती सम्पूर्ण जडिबुटीको मुल्य करिब २२ लाख ९१ हजार ३ रुपैयाँ रहेको छ ।

पक्राउ गरेर तामाङलाई डिभिजन बन कार्यालय लमजुङलाई बुझाइएको छ । तामाङलाई थप अनुसन्धान गरिने डिभिजन बन कार्यालयका प्रमुख मोहन काफ्लेले बताउनुभयो । अनुसन्धान गर्ने र कति अवैध हो, अति बैध छ त्यसको यकिन गरिएपछि बन ऐन २०७६ बमोजिम आवश्यक कारबाही हुने कुरा डिभिजन वन कार्यालयका प्रमुख काफ्लेले गण्डकी सन्देशलाई बताउनु भयो ।