कार्तिक १९ गते २०८१

पोखराका मेयर आचार्य इजिप्ट को राजधानी कायरोमा

पोखरा १९, कार्तिक

एशियाली विकास बैंकको निमन्त्रणामा संयुक्त राष्ट्र संघ मानव बसोबास कार्यक्रम तथा ईजिप्ट सरकारद्वारा आयोजित “दिगो शहरी विकास र मानव बसोबास सम्बन्धी विश्वव्यापी छलफल“ कार्यक्रममा पोखरा महानगरपालिकाका मेयर धनराज आचार्य इजिप्टको राजधानी कायरो जानु भएको छ ।

मेयर आचार्य बक्ताका रुपमा भाग लिन आइतबार कायरो प्रस्थान गर्नु भएको उहाँको सचिवालयले जनाएको छ । “सबै कुरा घरबाट सुरु हुन्छः दिगो शहर र समुदायका लागि स्थानीय क्रियाकलाप“ भन्ने नाराका साथ १५० भन्दा बढि राष्ट्रहरुको सहभागीतामा हुने कार्यक्रम नोभेम्बर ४ देखि ७ गते सम्म संचालन हुने भएको बताइन्छ । भ्रमणका क्रममा जलवायु परिवर्तन, एशियाली विकास बैंकको लागत साझेदारीमा सञ्चालित परियोजनाहरूको प्रगति, आगामी कार्यहरू, सम्भावित अवसरहरूको पहिचान तथा लगानी सुनिश्चितताको विषयमा छलफल हुने भएको छ ।

यस कार्यक्रम पोखराको दिगो विकास र ठूला परियोजनाहरूका अगाडि बढाउन अत्यन्त सहयोगी हुने मेयर आचार्यले विश्वास व्यक्त गर्नु भयो । साथै कार्यक्रमका दौरानमा विकास साझेदार संस्थाहरूको सहयोगमा पोखरामा संचालित तथा संचालनका लागि अगाडि बढेका २८ अर्बभन्दा बढीका परियोजनाहरुको प्रभावकारी कार्यन्वयनका लागि दातृ निकायका प्रतिनिधि संग कुराकानी हुने उहाँले जनाउनु भयो ।